InterForce qanoq pilersinneqarpa?

InterForce 1999-imi pilersinneqarpoq, sakkutooqarfiit nunani allani assigiinngitsunik suliassaqarnerulernerisa malitsigisaanik.

Taamani paasinarsivoq sakkutuut 10.000-it piaartumik pisariaqartinneqartut, taakkulu suliffeqarfinni atorfeqarnermi saniatigut sakkutuut piareersimasussattut Illersornissaqarfimmut isumaqatigiissuteqartut.

Taamaammat illersorniassaqarfimmi immikkoortortaqarfik pisariaqartinneqalerpoq, inuiaqatigiinni suliffeqarfiit Illersornissaqarfiullu akornanni suleqatigiittoqalernissaa pilersinniarlugu.

InterForce-p pilersinneqarnissaanut suliniut taamani Illersornissamut pisortaasup generaalip Christian Hvidt-ip aamma Aningaasaqarnermut Ministeriusup Knud Heinesen-ip pilersippaat. Knud Heinesen InterForce-mi Nuna tamakkerlugu siulittaasutut siullerpaatut ivertinneqarpoq. Nuna tamakkerlugu ataatsimiititaliaq suliffeqarfinni pingaarutilinni pisortaanernik aamma pisortat suliffeqarfiutaanneersunik kattuffiineersunillu inuttalersorneqarpoq.

Ataatsimiititaliap anguniagassaa siulleq tassaavoq Kunngeqarfimmi suliffeqarfiit anginerit 200t attavigissallugit Interforcelu pillugu paasisitsiniaassallutik. Suliffeqarfiillu akunnattumik angissusillit kingorna mail-ikkut attavigneqarput. Interforcellu attaveqaatai aamma amerliartuinnarlutik.

Interforcemiit 2006 tikillugu salliutillugu aallunneqarpoq Sakkutuutut piareersimasut aamma taakku soqutigisaat inuiaqatigiinni suliffeqarfinnut oqaaseqarfigisassallugit siuarsarlugillu. Qallunaat suliffeqarfiutaannut oqariartuutigineqartarpoq Sakkutuutut piareersimasut suliffimminniit sulinngiffeqartarnissaat periarfissaasariaqartoq, soorlu Illersornissaqarfimmi ilinniagaqaqqissappata imaluuniit Kunngeqarfiup sillimaniarneranut suliassaqarneranni.

Hjemmeværnetimi (Nunagisaminnik illersuisut) kajumissutsiminnik suliaqartartut InterForce-mut 2006-imi ilanngunneqarput. Kystredningstjenesten-imi (Sineriammi annaassiniartartut) kajumissutsiminnik suliaqartut (Sineriammi annaassiniartartut) 200-t 2012-imi ilanngupput, Beredskabsstyrelsen-imut (Upalungaarsimanermut aqutsisoqarfik) kajumissutsiminnik suliaqartartut 2022-mi ilanngullutik.

Taakkulu tamakkiisumik Sakkutuutut piareersimasutut taaneqartarput, aamma kajumissutsiminnik suliaqartartut ukunani Hjemmeværnet, Beredskabsstyrelsen aamma Kystredningstjenesten-imi suliaqartartut ilanngullugit.

Taamaammat InterForcep sulliffeqarfinnut sakkutuutut piareersmasut pillugit paasisitsiniaaneq suliassaraa.

InterForce 1999-imiilli pilersinneqarnerata kingorna nunap immikkoortoqarfiinik inerisaasoqarpoq.

Qallunaat Nunaanni nuna tamakkerlugu ataatsimiisitaliap saniatigut nunap immikkoortuani arfinilinni Jyllandip avannaani, Jyllandip qeqqani, Qallunaat Nunaata kujataani, Sjællandimi, illoqarfiit pingaarnissaani aamma Bornholmimi aqutsisoqatigeeqarpoq.

Illersornissaq pillugu ministeriusup Trine Bramsen-ip aamma illersornissaq pillugu pisortaasup generaali Bjørn Bisserup-ip InterForce Kalaallit Nunaanni immikkoortoqalernissaa 2022-imi augustimi suliaraat. InterForce Kalaallit Nunaat Qallunaat Nunaanni immikkoortoqarfiit assigalugit pilersinneqarpoq. Pilersinneranullu siunertaavoq nammineq kajumissuseq atorlugu sakkutuutut piareersimasussat pilersinneqarnissai, tamannami Illersornissaq pillugu isumaqatigiissummi 2018-2023-imut atuuttumi aalajangerneqarmat, aamma Illersornissaqarfiup Kalaallit Nunaanni inuussutissarsiortunik attaveqarnera inerisassallugu.

Suliffeqarfiit - namminersortut aamma pisortat ingerlataat- 3.700t maannamut InterForce tapersersorumallugu ilaasortanngoreerput. Taakku katillugit 1.000.000-nik sulisoqarput.